الجرى تحت المطر متعة ومغامرة

 

عشان احنا في "منتزة رانرز" عارفين إن شغف الجرى مش بيروح مع شمس الصيف، بنقدم لكم نصايح مهمة عشان تستمتعوا بالجرى حتى لو الجو مطر والدنيا شتا

أساسيات الجرى تحت المطر:

· يا ترى الجرى تحت المطر أمان؟

  أيوه، آمن جداً في الأمطار الخفيفة والمتوسطة. بس طبعاً مفيش جرى لو فيه عاصفة رعدية. سلامتك أهم حاجة

· اللبس يكون إزاي؟

  أهم حاجة تبعد عن الملابس القطنية لأنها ح تشرب مية المطر! خلي ملابسك "بلايش تكنيكال" الملابس اللى تم تصميمها بمميزات امتصاص العرق والمية وتصريفها بسرعة وخفيفة الوزن ومرنة وليها تهوية جيدة وبتنظم درجة حرارة الجسم، ومعاها جاكيت مضاد للمية وخفيف. ممكن تلبس "كاب" عشان المطر ميدخلش في عينيك، واختار كوتشي جرى مريح وعليه "جريپ" كويس عشان ميزحلقش

· حاجات مهمة قوى:

  · ادهن أماكن الاحتكاك في جسمك (زي تحت الإبطين) بـ "فازلين" أو كريم مخصوص عشان الملابس المبلولة بتبقى خشنة وممكن تبقى مؤذية مع الاحتكاك

  · لازم تلبس ألوان فاتحة أو عليها شرائح عاكسة عشان اللي سايق عربية يشوفك بوضوح في الأجواء الشتوية

  · استمتع بالجري ومتجريش بسرعة عشان الأرض ممكن تكون بتزحلق

  · بعد ما تخلص على طول، بدل هدومك المبلولة فوراً عشان متعرضش جسمك لضعف المناعة وتقدر تواجه أي فيروسات حواليك زي البرد و الانفلونزا

نصايح للسلامة:

· خلي بالك من الأرض:

  الأمطار بتكون غدارة شوية! ممكن تخبيلك الحفر أو الأرض تكون مش مستوية. ف خد بالك واجري على الأرض الواضحة مش الأرض اللي مليانة ميه ومش واضح تفاصيلها تحت الميه ايه

· متستهونش لو في رعد وبرق:

  تاني.. لو الشتا معاه رعد وبرق، بلاش جرى أو وقف جري و روح البيت. متقفش تحت شجرة أو تقف قريب من عامود نور

· الاستفادة من جو الشتا والمطر:

  الجرى تحت المطر وفي الجو البارد ده أحسن حاجة تهيئك لأقوى أداء! عارف ليه؟ عشان دا:

  · تدريب على الظروف الصعبة: جسمك بيتعلم يعدل درجة حرارته ويدير الطاقة بشكل أفضل. اللى بيجرى في البرد، بيبقى عنده قدرة تحمل أعلى في الجو العادي

  · حرق أكتر للسعرات: جسمك بيعمل مجهود أكبر عشان يدفي نفسه.. يعني سعرات إضافية بتتحرق من غير ما تحس

  · تقوية العقل: لما تخرج من دفا البيت وتواجه البرد والمطر، انت كده بتبني عزيمة نفسية جامدة. يوم السباق هيبقى سهل عليك اجوائه

  · ح تجري في زحمة  أقل: الأمطار والبرد بيخلوا الناس تقعد في البيت. و يبقى الطريق ليك لوحدك

  · ح يمنحك عضلات أقوى وأداء أفضل: الجري في البرد والمطر بيعزز قوة عضلاتك وكفاءتها. لأن العضلات في الجو البارد بتكون محتاجة مجهود أكبر عشان تعمل نفس الحركة، فده بيزود من كفاءة الدورة الدموية ويقوي العضلات النشطة. وكمان درجة الحرارة المنخفضة بتسرع عملية الاستشفاء العضلي وتقلل الالتهابات، فتصحى اليوم اللي بعده وعضلاتك "فريش" وأقوى من الأول! يعني كأنك عملت تمرين استشفا إضافي مجاني

· وبعد الجرى؟

  هات شاى أو قهوة دافية، واستمتع بمنظر المطر .. بعد ما تكون غيرت هدومك طبعاً! وكمان لازم تنشف الكوتشي وهدومك كويس عشان تفضل معاك فترة طويلة

يلا بينا:

متفكرش كتير. المطر والبرد مش عوائق، دول بيعملوا جو جديد ومتعة مختلفة وبيحولوك لرانر أَقوى! انتظم في تدريبات "منتزة رانرز" وهتقدر تجرى في كل الفصول وبكل ثقة

دليل منتزة رانرز الذهبي لجري سباق ١٠ كيلومتر

 

الجري في سباق ١٠ كيلومتر هو تحدي رائع محتاج تدريب على مزيج من اكتساب اللياقة البدنية، والتركيز الذهني، والتكتيك الصح لتوزيع الجهد. وفي المقال هنا، منتزة رانرز ح تساعدك على تحقيق أفضل أداء من خلال تحليل مراحل الجري المختلفة بناءاً على خطط منتزة رانرز للجري بذكاء وتقسيم المسافة لمراحل في برامجها التدريبية اللي بتأهلك لتحقيق أفضل أداء

المرحلة الأولى: أول خمسة كيلومتر – بداية السباق

في أول خمسة كيلومتر، المفتاح الأساسي هو ظبط وتيرتك والاستقرار عليها من اول لحظة الانطلاق. ناس كتير في البداية بيقعوا في فخ السرعة الزايدة بسبب الحماس، وبعد كده بيفقدوا السيطرة على نفسهم وبيفقدوا السيطرة على طاقتهم بسرعة. عشان كده، لازم تركز على النقط دي:  

   • أوعى تقلق من المسافة الباقية، ركز بس على انك تحافظ على وتيرتك
   • خلي نفسك مرتاح، واستغل أول ٢ كيلو تظبط فيهم النفس والتنفس بشكل صحيح
   • خلي بالك إحساسك في البداية في الغالب مش بيكون سهل جداً، بس كمان مش لازم يكون صعب من أول لحظة، ف متصعبهاش على نفسك

المرحلة الثانية: من الكيلو السادس للتامن - البداية الحقيقية للمعركة

المرحلة دي هي اللي بتبدأ تحس فيها إن الأمور بتكون أصعب عقلياً وجسدياً. تقدر تعتبرها النقطة الفاصلة في السباق لأنك محتاج ترفع مستوى تركيزك وشجاعتك. هنا ح اقولك شوية نصائح مهمة عشان تقدر تكمل بقوة:  

   • خليك مرتاح في جريك لكن زود الجهد تدريجياً عشان تحافظ على وتيرتك
   • حافظ على شجاعتك، خصوصاً لما توصل عند الكيلو التامن، لأنه ح يكون اختبار لقوتك
   • فكر بطريقة إيجابية وركز على إنك تعدي المرحلة دي بنجاح

المرحلة الثالثة: الكيلو التاسع وأول ٦٠٠ متر من الكيلو العاشر – المرحلة الحاسمة

هي دي المسافة اللي بتحس فيها إن جسمك تعب جداً، ورجلك مش عايزة تكمل. لكن هو ده وقت الضغط الحقيقي على تعبك، الوقت اللي لازم تستجمع كل طاقتك عشان توصل لخط النهاية. عشان كده، ركز على الحاجات دي:  

   • حافظ على جسمك في وضعية قوية وراجع اكتر من مرة وضعية جسمك السليمة أثناء الجري
   • استخدم التنفس العميق عشان تسيطر على التعب
   • متخليش إحساس التعب يسيطر عليك، وافتكر إنك قربت جداً من خط النهاية

المرحلة الأخيرة: آخر ٤٠٠ متر – الإنهاء بقوة

وصلت لآخر ٤٠٠ متر، وهنا كل شيء بيتلخص في إنك تدي كل اللي عندك. لكن خد بالك، مش لازم تعمل خطوات واسعة طول مسافة الـ ٤٠٠ متر، وركز اكتر على الخطوات السريعة والقوية. علشان تضمن أقوى إنهاء ممكن:

   • استخدم دراعاتك بقوة علشان تدي دفعة إضافية لجسمك
   • متخليش حد يسبقك في اللحظات الأخيرة، خلي تركيزك كله على خط النهاية
   • لما تقرب من خط النهاية، استمتع باللحظة دي، وادي كل اللي عندك

الجري بذكاء مش بس بقوة

الجري لمسافة ١٠ كيلومتر مش مجرد اختبار لقوة التحمل، لكن كمان تحدي ذهني لازم تكون مستعد له. تقسيم الجري لمراحل ذكية، وظبط النفس، واستخدام العقل في التحكم في طاقتك هو اللي بيخلي الفروق واضحة بين رانر و رانر تاني. لو مشيت بالنصايح دي مع تدريبات منتزة رانرز، ح تحقق أفضل أداء ليك وتستمتع بالجري بأقصى درجة ممكنة

نرمين موسى - مصر

 

كيف أصبحت الرياضة جزءاً من حياتي مع منتزة رانرز ؟

لم تكن الرياضة يوماً جزءاً من حياتي اليومية، بل كانت مجرد فكرة بعيدة عن التنفيذ، حتى جاء يوم قررت فيه أن أجرب شيئاً جديداً. بدأت رحلتي في أغسطس ٢٠٢١، حين أخذت أول خطوة في عالم الرياضة. كان الأمر مجرد تجربة، تمرين بسيط استمر ساعة واحدة، وشمل الإحماء، ثم تدريباً أساسياً لمدة ٢٠ دقيقة، ثم الإطالات. لم أكن أعلم أن هذه الساعة ستكون نقطة التحول في حياتي

في البداية، لم يكن الأمر سهلاً، كانت هناك تحديات، وأسئلة كثيرة تدور في ذهني. لكنني كنت محظوظة بوجود شخص داعم وقائد ملهم مثل الكابتن أحمد علم الدين، الذي لم يبخل أبداً بالإجابات المختصرة والمفيدة. يوماً بعد يوم، بدأ جسدي يعتاد على الرياضة، وأصبحت المسافات التي أجريها تزداد تدريجياً، من كيلومتر واحد إلى كيلومترين، إلى أن وصلت إلى عشرة كيلومترات! كان ذلك إنجازاً لم أصدق أنني قادرة على تحقيقه

المشاركة في السباقات كانت محطة أخرى مهمة في رحلتي. لم أكن أتوقع أنني سأنافس يوماً ما، لكن مع كل سباق شاركت فيه، كنت أشعر بقوة أكبر، وأكتشف إمكانيات جديدة داخل نفسي. شاركت في سباقات داخل الإسكندرية وخارجها، وحققت مراكز متقدمة في فئتي العمرية، منها المركز الثاني والمركز الثالث. لم يكن الأمر مجرد أرقام أو ميداليات، بل كان إثباتاً لنفسي أنني أستطيع، وأن الرياضة ليست مجرد نشاط، بل أسلوب حياة يمنحني القوة والثقة

منتزة رانرز لم يكن مجرد كيان رياضي بالنسبة لي، بل أصبح عائلتي الثانية. وجدت فيه دعماً نفسياً واجتماعياً لا يقدر بثمن، وأصبح جزءاً من حياتي اليومية وروتيني الأساسي. ولحظة وصولي إلى الوزن المثالي كانت من أجمل محطاتي، حيث لم يعد الجري مجرد تمرين شاق، بل تجربة ممتعة أعيشها بكل راحة

أوجه شكري وامتناني لمنتزة رانرز، الكيان الذي غير حياتي وأضاف لي الكثير. أتمنى أن يكون ما مررت به مصدر إلهام لكل شخص لم يبدأ بعد في ممارسة الرياضة. العمر مجرد رقم، والهدف هو الدافع، والطريق مليء بالمحطات التي تستحق أن نخوضها. في كل تمرين يوجد بطل، وكل خطوة تقربنا من إنجاز جديد

عاش منتزة رانرز ❤️💙❤️